Beschreibung
Ds Alphirtefescht, wo Stadt u Land söll verbinde, isch vorbereitet. D Teilnähmer u d Bsuecher chöme langsam i Feschtluune. Nume ganz wenegi wüsse, dass die fridlechi Stimmig tüüscht. Sys d Béliers, wo - einisch meh! - Unspunne wei missbruche, für chönne politisches Kapital drus z schla? Oder stecke anderi Chreft derhinder? Wo im Tällspielareal während ere Uffüehrig gschosse wird - u zwar nid nume mit em Täll syre Armbruscht - droht däm eigetlech fridleche Fescht sogar der Abbruch.
Autorenportrait
Der Ernst Hunziker isch im Jahr 1955 z Boltige uf d Wält cho. Nach em Schuelabschluss het er Spängler-Installateur glehrt. 1980 isch er zum Tal us u het sech i der Region Interlake nidergla. Dert het er guet zwänzg Jahr bi der Gmeind Interlake gwärchet u isch jetze syt füfzäh Jahr Kommandant vo der regionale Zivilschutzorganisation. I syre Freizyt schrybt er Mundart-Gschichte. Krimi, Romän u o Theaterstück. "Unspunne" isch der dritt Krimi mit em Fahnder Flück.
